Mien mouder dij wol mi geven

Mien mouder dij wol mi geven
Een smid al mit geweld,
Een smid om mit te leven
En dat allain mit geld.
O nee, o nee, zo’n swaarte smid,
Dij is moar ainmoal in de weke wit.
En dan, en dan; en dan;
Wat mout ik mit zo’n man?

Mien mouder dij wol mi geven
Een bakker mit geweld,
Een bakker om mit te leven
En dat allain mit geld.
O nee, o nee, zo’n kiek-in-d’ov’n,
Dij is ja hailegoar mit meel bestovn.
En dan, en dan; en dan;
Wat mout ik mit zo’n man?

Mien mouder dij wol mi geven
Een mulder mit geweld,
Een mulder om mit te leven
En dat allain mit geld.
O nee, o nee, zo’n kiek-in-de-wind,
Dij steelt oet ieder, ieder zak een spint.
En dan, en dan; en dan;
Wat mout ik mit zo’n man?

Mien mouder dij wol mi geven
Een snieder mit geweld,
Een snieder om mit te leven
En dat allain mit geld.
O nee, o nee, zo’n knip-met-de-scheer,
Dij steelt ja lappen: die bringt ze nait weer.
En dan, en dan; en dan;
Wat mout ik mit zo’n man?

Mien mouder dij wol mi geven
Een boer al mit geweld,
Een boer om mit te leven
En dat allain mit geld.
O nee, o nee, zo’n rieke boer,
Dij stait ja altied, altied op de loer.
En dan, en dan; en dan;
Wat mout ik mit zo’n man?

Mien mouder dij wol mi geven
Een schipper mit geweld,
Een schipper om mit te leven
En dat allain mit geld.
Zo’n schippertje, zo’n schippertje,
Dij heb ik alzo alzo laif, zo laif:
Veul laiver een boer of ‘n schippertje,
Als zo ain börgerslaif!